Día de la Reciella 2016: Programa

programa_diareciella2016

PROGRAMA DÍA DE LA RECIELLA 2016

Domingu 2 d’ochobre de 2015 – Muséu del Pueblu d’Asturies (Xixón)

 

10.00 Entrega dorsales de la I Entaína. Llugar señaláu al llau de la bolera (Muséu del Pueblu d’Asturies)11.00 Salida Entaína.

 11.30 Llegada de la carrera, entrega avituallamientu, llectura manifiestu y sortéu premios.
12.00 Partíu fútbol infantil exhibición U.C. Ceares comentáu por Nacio González.
12.30 Taller “Facemos llambiotaes” cola collaboración de Miel Et canelle
12.30 Taller  “Facemos xuguetes con material reciclao” cola collaboración d’EMULSA
13.00 Cuentacuentos a cargu de l’actriz Olga Cuervo
14.00 Posa y xinta con comida y bébora variao (tamién vegano) nel chigre de Reciella.
16.00 Cuentacuentos y taller Samalandrán. Islla de lleendes
17.00 Taller “Bombes pa les nueses amigues les abeyes”
17.30 Actuación de la banda infantil de Gaites de Villaviciosa “El Trubiecu”
18.30 Conciertu Bestiariu
Amás: Pintacares (12.00 y 17.00 hores), rifa de productos infantiles n’asturianu enantes del conciertu,  tiendes del aire con lliteratura y música infantil y xuvenil de la editorial Pintar-Pintar,  xuegos tradicionales cola collaboración del Garrapiellu y los personaxes de Moyando’l culu de Ruma Barbero en photocall. Toles actividaes son gratuites sacante’l pintacares (1€). Pa los talleres y el pintacares fai falta acutar plaza nel puestu de Reciella.

Programa: Día de la Reciella 2015

PROGRAMA DÍA DE LA RECIELLA 2015

Domingu 4 d’ochobre de 2015 – Muséu del Pueblu d’Asturies (Xixón)

11.00. Taller de xuegos tradicionales asturianos
Entama Asociación Cultural Esbilla
12.00. Conciertu del Dúu Mestura 
13.00. Taller gastronómicu “Descubriendo los nuestros quesos” con Lluis Nel Estrada (“40 Primaveres”) y la colaboración de La Gijonesa.
14.00 Posa y xinta
16.00 Gynkana infantil: “Lletres nel Muséu”
17.00 Taller “Xugando cola música”
Entama Escuela de Música Tradicional La Quintana.
18.00 Conciertu músicos La Quintana
19.00 Danza Prima y Pieslle

Amás: Pintacares (12.00 y 17.00 hores), rifa de productos infantiles n’asturianu (18.30), tiendes del aire con llibros de lliteratura infantil y xuvenil, espaciu pa les asociaciones y los servicios de normalización llingüística, TV n’asturianu con “Presta Asgaya”, comida y bébora, y la esposición “Agora Quini, agora“.

*La entrada ye llibre y toles actividaes y talleres son gratuites sacante’l pintacares (1 €)
Los menores tienen de tar acompañaos por una persona adulta en tou momentu.
El taller gastronómicu precisa d’inscripción previa na tienda del aire de Reciella.

Nota prensa: Menudu Traxín

El xueves 2 “Menudu Traxín”, averará’l baille y el traxe tradicional asturianu a lo más pequeño de la casa

L’actividá, entamada por Vezos Astures y Reciella,  ye gratuita y va facese nel patiu del Colexu Xovellanos de Xixón

Cartelu_MenuduTraxín“MENUDU TRAXÍN, día del traxe y el baille tradicional pa neños y neñes” ye una iniciativa con vocación de continuidá añal entamada por Vezos Astures y Reciella p’averar el traxe y el baille tradicional a lo más pequeño de la casa.

La so primer edición va celebrase esti xueves 2 d’abril nel patiu del Colexu Xovellanos de Xixón (entrada pela cai Begoña) dende les 10.30 hasta les 14.00 hores. Toles neñes y neños – y les sos families- tán convidaos a venir; col traxe o ensin él, sepan o nun sepan baillar y falen o nun falen asturianu.

Va haber talleres, xuegos, y actividaes pa deprender a baillar y pa conocer el traxe del país, too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes.

Tolos neños y neñes tienen que dir acompañaes d’una persona adulta. La entrada ye llibre y toles actividaes son gratuites y cuenten cola collaboración del Colexu Públicu Xovellanos y la Oficina de Normalización Llingüística de Xixón.

PROGRAMA

10.30 h. ENTAMU: xuegos tradicionales, photocall, talleres de colorear

12.00 h. TALLER DE BAILLE: Páxara Pinta, Capuchinos, Cachetíus y Danza del Pumba.

13.00 h. PASACAIS

Vuelve’l Festival Escenines

Un añu más vuelve’l festival Escenines pa la Reciella coincidiendo coles vacaciones del iviernu.

Nesti casu vamos poder cuntar con cuatro representaciones que van desarrollase a lo llargo de les dos selmanes que duren les vacaciones. Toes elles van tener llugar nel C.P. Jovellanos de Xixón a les 19.00 hores, y toes elles son asina mesmo d’entrada llibre hasta completar l’aforu.

PROGRAMA

Llunes 22 d’avientu
Olga Cuervo col cuentacuentos “Coses de neños”
Vienres 26 d’avientu
El Turnebís del Tribilín col teatru de solombres “El cuélebre de San Llorienzu y otres histories”
Martes 30 d’avientu
Carlos Alba “Cellero” col cuentacuentos “Ecolocuentos”
Vienres 2 de xineru
Compañía Higiénico Papel col espectáculu “Árbol”
Cartelu de la edición del Festival Escenines del añu 2014

Cartelu de la edición del Festival Escenines del añu 2014

Programa: Día la Reciella 2014

El Día la Reciella, aventu qu’organiza  l’asociación “Reciella: Families pol asturianu” y que va tener llugar esti domingu 5 d’ochobre nel Muséu del Pueblu d’Asturies, yá tien programa zarráu.

Lo mesmo que na primer edición, celebrada nel mes de setiembre del añu pasáu, la programación, qu’entama a les 11 la mañana y rematará a les 7 la tarde cola danza prima, ta enllena d’actividaes de toa triba, simpre col asturianu como idioma vehicular.

Asina a partir de les 11.00 la mañana les asociaciones Trebeyos y Esbilla, van empobinar dos espacios con xuegos medievales y tradicionales asturianos respectivamente.

Un poco más alantre, a les 12.30 la mañana, ta prevista la exhibición infantil de Bolos organizada en collaboración cola Federación Asturiana, y que tendrá la bolera del Muséu del Pueblu d’Asturies como escenariu. Na mesma van participar neños y neñes federaes de la Peña Morcín, actuales subcampeones infantiles d’Asturies na modalidá de cuatriada.

Dempués de la xinta, que podrá realizase nel mesmu recintu al instalase un puestu de comida y bébora, el programa de tarde va entamar cola participación de los promotores de El cantar del vasu, iniciativa que tien por oxetu, pente medies del xuegu del vasu, visibilizar la importancia de la tresmisión xeneracional del idioma.

Una vuelta ximielgaos los vasos col cantar melgueru que los acompaña, ye tiempu de siguir cola música pente medies del taller d’instrumentos tradicionales dirixíu pol músicu David Varela, qu’entamará a les 17.00 hores de la tarde.

Una hora dempués, y como ramu a la xornada, tendrá llugar nel escenariu situáu nel Tendayu del Muséu’l conciertu acústicu de Pop Piquiñín, pal que tienen preparaes dos sorpreses: la participación de convidaos mui especiales y l’adelantu de dellos temes de “Nun mos gusten los llunes“, el so segundu discu n’asturianu.

Amás de toes estes actividaes, nel espaciu del Tendayu y el prau central van asitiase dellos puestos: los de lliteratura infantil y xuvenil de les editoriales Trabe y Pintar-Pintar, el de la Rede de Normalización Llingüística nos conceyos y el propiu de l’asociación Reciella, con información sobre l’asociación y dellos materiales nuevos y pintacares poniendo color a la Reciella a les 12 y 16.00 hores.

 

PROGRAMA: DÍA DE LA RECIELLA 2014

 

11.00 Xuegos Medievales (Trebeyos) y Xuegos Tradicionales Asturianos (Esbilla)

12.30 Exhibición Infantil de Cuatriada

         Bolera del Muséu del Pueblu d’Asturies

POSA y XINTA

16.00 “El cantar del vasu”

         Prau central

17.00 Taller d’Instrumentos Tradicionales

         Tendayu

18.00 Pop Piquiñín n’Acústico

         Tendayu

19.00 Danza Prima

         Prau central

Amás: llibros, música, pintacares…

Dende l’asociación Reciella recordamos que los menores tienen de tar acompañaos por una persona adulta el tolos talleres y actividaes.

Materiales nuevos Reciella

El Día la Reciella volverá al Muséu del Pueblu d’Asturies

Cartelu Día la Reciella 2014

Cartelu Día la Reciella 2014

L’asociación “Reciella: families pol asturianu” ta acabante facer públicu’l cartel pa la segunda edición del Día de la Reciella, que volverá a celebrase nel Muséu del Pueblu d’Asturies de Xixón.

Dende Reciella anuncien que la xornada, que tien por oxetu pasar un día en familia y n’asturianu, va tener llugar el próximu domingu 5 d’ochobre, dende les 11.00 hores hasta les 19.00 hores de la tarde.

Otra miente, y como yá ocurriera l’añu pasáu, habrá una serie de puestos fixos, como pudieren ser los de llibros de Lliteratura Infantil y Xuvenil n’asturianu, un puestu de les Oficines de Normalización Llingüística o’l propiu espaciu de l’asociación Reciella. Asina mesmo, el programa d’actividaes va comprender dende talleres de música tradicional a una exhibición infantil de bolos, que cuenta cola collaboración de la Federación Asturiana de Bolos; hasta la música que marcará la xornada de tarde.

El programa completu, asina como los horarios de les diferentes actividaes, van dase a conocer la selmana qu’entra.

Anunciu Día de la Reciella 2014:

Yá tenemos cartelu pal Día de la Reciella

Cartelu Día la Reciella 2014

Cartelu Día la Reciella 2014

Coincidiendo con esti día tan señaláu préstanos compartir el cartelu de la segunda edición del Día la Reciella, eventu que yá tien fecha y sitiu: será nel Muséu del Pueblu d’Asturies de Xixón el próximu domingu 5 d’ochobre, esto ye, dientro de dalgo menos qu’un mes.

Pente medies d’esta web y les redes sociales diremos dando anuncia más detallada de les actividaes y sorpreses que tenemos preparaes. ¡Tar sollertes y prestosu Día d’Asturies a toes y toos!

Entrevista La Nueva España (26 de febreru)

“Los neños puen pasalo bien n’asturianu ensin problema nengún”

Reciella y la Estaya de la Llingua d’Avilés entamaron delles actividaes pa llevar l’idioma a les xeneraciones nueves

Damián Barreiro

Montse Machicado, responsable de la Estaya de la Llingua d’Avilés, y Félix Fernández, de l’asociación de families Reciella

Montse Machicado, responsable de la Estaya de la Llingua d’Avilés, y Félix Fernández, de l’asociación de families Reciella

Esti 21 de febreru empezaron les actividaes que punxo en marcha l’asociación Reciella (Families pol asturianu) y la Estaya de la Llingua d’Avilés. Van ser un conxuntu de diez espectáculos que se van celebrar a lo llargo d’esti añu y que, como espliquen Félix Fernández, miembru de Reciella, y Montse Machicado, encargada de la Estaya; quieren ayudar a tresmitir l’idioma ente los asturianos más piquiñinos.

¿Cómo surdió esta collaboración?

Félix Fernández-  L’asociación nació pa facilitar la tresmisión de la llingua a los más neños, dalgo que ye complexo dientro del ámbitu familiar –porque los neños perciben la falta de prestixu del idioma- y, sobre too, fuera d’esti; tol entornu social ye contrariu a esa tresmisión. Por eso, l’añu pasáu vinimos presentanos al serviciu de normalización y surdió la idea de trabayar nesi sentíu.

Montse Machicado –  Ellos espresaron la so esmolición porque n’Avilés nun había actividaes pa los más neños na so llingua propia. Evidentemente, había munches otres coses, pero como pas y mas falantes d’asturianu nun teníen una programación específica pa los sos fíos. L’añu pasáu, por cuestiones presupuestaries, foi una programación mui curtia, pero esti añu yá se planteó como un ciclu y como dalgo que va siguir.

Son un total de diez actividaes, ¿cómo s’escoyeron?

M.M – Foi la mesma Estaya la que fixo una esbilla ente lo poco qu’hai. Un pilancu más, porque nun hai muncho y menos pa dalgo tan específico como son los neños. Dientro de la ufierta curtia escoyimos a xente como Olga Cuervo o Carlos Alba, que trabayen esti ámbitu.

Nesti momentu de recortes ye importante que sía la sociedá civil la que reclame actividaes…

M.M – La demanda social ye lo que nos mueve. Presta ver qu’hai persones que s’esmolecen pol futuru de la llingua. Amás, tamién hai que reseñar que’l mesmu Conceyu dedica un presupuestu a estes actividaes, cosa que nun pasa en tolos llaos.

F.F – El futuru d’un idioma nun pue depender namás de dir nuna manifestación cola pancarta. Tien qu’haber xente organizao, que decida facer coses que funcionen, porque estes actividaes tuvieron munchu éxitu. L’añu pasáu enllenamos, dalgo que dio fuelgos pa siguir alantre. Sobretoo, presta ver la reacción de los pas al comprobar que los guah.es puen esfrutar n’asturianu ensin nengún problema.

¿Cómo valoráis la importancia d’un día como’l de la llingua materna?

M.M – Ye un día que tendría que tar marcáu n’encarnáu nel calendariu. Si nun hai tresmisión xeneracional apaga y vámonos. Una sociedá ensin llingua y ensin cultura queda en nada.

F.F – Una de les mios fíes va tovía a la guardería, onde nun pue dar asturianu. Quiximos mover actividaes, pero nun hai xente formao. Falta la voluntá política pa que les escueles infantiles tengan recursos y puedan facer coses pol idioma.

Galeríes de Semeyes: Escenines

Apurrimos una galería de semeyes de les actividaes d’iviernu qu’axuntamos baxo’l nome de “Escenines”.

Nella vais poder ver la ópera infantil “Los amorinos de Bastián y Bastiana” de Nun Tris Teatru; la obra “Dos Rosines” de Compañía Olga Cuervo; el cuentacuentos “Mitoloxíes” qu’empobinó Carlos Alba “Cellero”; toes elles desarrollaes nel C.P.Xovellanos al que damos les gracies, n’especial al so director Mario Fueyo, poles facilidaes y les semeyes.

Otra miente tán tamién nesta entrada les semeyes del conciertu “Pop piquiñín” que tuvo llugar nun Teatru Xovellanos que cásique quedó completu coles más de 700 persones qu’acudieron a sentir los cantares n’asturianu de Petit Pop. Munchísimes gracies al grupu y collaboradores d’esti conciertu, a Araz Net por editar un discu tan prestosu, a Javi Lueje poles semeyes y el videu que verá la lluz en pocu tiempu,  y a la Fundación Municipal de Cultura del Ayuntamientu de Xixón y la Caxa Rural pol so sofitu pa toes estes actividaes.

“Los amorinos de Bastián y Bastiana” de Nun Tris

Vienres 20 d’avientu Colexu Públicu Xovellanos
Hora: 18.00

Entrada gratuita
Una ópera de W.A. Mozart, pa públicu infantil-familiar

Bastian_Bastiana

La historia d’esta obra que Mozart compunxo de neñu,  tien llugar nuna villa rural. La pastorina Bastiana tien miéu perder l’amor de Bastián. Visita a un bruxu, Colás, una especie de guirriu, pa intentar volver a namoralu. Colás camienta que nun ye que Bastián dexara d’amala, sinón que sucumbiera a los encantos d’una dama que vive en palaciu (que ye la que-y da trabayu a Bastián na ciudá, aparte d’otros agasayos). Aconseya Colás a Bastiana que faga como qu’ ama a otru. Bastián a la vuelta tien miéu que Bastiana nun lu quiera, y tamién visita a Colás, que-y asegura l’amor de Bastiana con un ritual máxicu. Cuando ve que Bastiana tien un comportamientu un tantu desapegáu, Bastián amenaza con suicidase, pero Bastiana nun lu dexa. A la fin, los amantes abrácense y remata la ópera con un curtiu y prestosu tríu final.

Nesta orixinal propuesta pártese d’elementos tradicionales, que van evolucionar a paisaxes urbanos asitiando l’aición na Asturies del S XIX.