Entrevista La Nueva España (26 de febreru)

“Los neños puen pasalo bien n’asturianu ensin problema nengún”

Reciella y la Estaya de la Llingua d’Avilés entamaron delles actividaes pa llevar l’idioma a les xeneraciones nueves

Damián Barreiro

Montse Machicado, responsable de la Estaya de la Llingua d’Avilés, y Félix Fernández, de l’asociación de families Reciella

Montse Machicado, responsable de la Estaya de la Llingua d’Avilés, y Félix Fernández, de l’asociación de families Reciella

Esti 21 de febreru empezaron les actividaes que punxo en marcha l’asociación Reciella (Families pol asturianu) y la Estaya de la Llingua d’Avilés. Van ser un conxuntu de diez espectáculos que se van celebrar a lo llargo d’esti añu y que, como espliquen Félix Fernández, miembru de Reciella, y Montse Machicado, encargada de la Estaya; quieren ayudar a tresmitir l’idioma ente los asturianos más piquiñinos.

¿Cómo surdió esta collaboración?

Félix Fernández-  L’asociación nació pa facilitar la tresmisión de la llingua a los más neños, dalgo que ye complexo dientro del ámbitu familiar –porque los neños perciben la falta de prestixu del idioma- y, sobre too, fuera d’esti; tol entornu social ye contrariu a esa tresmisión. Por eso, l’añu pasáu vinimos presentanos al serviciu de normalización y surdió la idea de trabayar nesi sentíu.

Montse Machicado –  Ellos espresaron la so esmolición porque n’Avilés nun había actividaes pa los más neños na so llingua propia. Evidentemente, había munches otres coses, pero como pas y mas falantes d’asturianu nun teníen una programación específica pa los sos fíos. L’añu pasáu, por cuestiones presupuestaries, foi una programación mui curtia, pero esti añu yá se planteó como un ciclu y como dalgo que va siguir.

Son un total de diez actividaes, ¿cómo s’escoyeron?

M.M – Foi la mesma Estaya la que fixo una esbilla ente lo poco qu’hai. Un pilancu más, porque nun hai muncho y menos pa dalgo tan específico como son los neños. Dientro de la ufierta curtia escoyimos a xente como Olga Cuervo o Carlos Alba, que trabayen esti ámbitu.

Nesti momentu de recortes ye importante que sía la sociedá civil la que reclame actividaes…

M.M – La demanda social ye lo que nos mueve. Presta ver qu’hai persones que s’esmolecen pol futuru de la llingua. Amás, tamién hai que reseñar que’l mesmu Conceyu dedica un presupuestu a estes actividaes, cosa que nun pasa en tolos llaos.

F.F – El futuru d’un idioma nun pue depender namás de dir nuna manifestación cola pancarta. Tien qu’haber xente organizao, que decida facer coses que funcionen, porque estes actividaes tuvieron munchu éxitu. L’añu pasáu enllenamos, dalgo que dio fuelgos pa siguir alantre. Sobretoo, presta ver la reacción de los pas al comprobar que los guah.es puen esfrutar n’asturianu ensin nengún problema.

¿Cómo valoráis la importancia d’un día como’l de la llingua materna?

M.M – Ye un día que tendría que tar marcáu n’encarnáu nel calendariu. Si nun hai tresmisión xeneracional apaga y vámonos. Una sociedá ensin llingua y ensin cultura queda en nada.

F.F – Una de les mios fíes va tovía a la guardería, onde nun pue dar asturianu. Quiximos mover actividaes, pero nun hai xente formao. Falta la voluntá política pa que les escueles infantiles tengan recursos y puedan facer coses pol idioma.

Galeríes de Semeyes: Escenines

Apurrimos una galería de semeyes de les actividaes d’iviernu qu’axuntamos baxo’l nome de “Escenines”.

Nella vais poder ver la ópera infantil “Los amorinos de Bastián y Bastiana” de Nun Tris Teatru; la obra “Dos Rosines” de Compañía Olga Cuervo; el cuentacuentos “Mitoloxíes” qu’empobinó Carlos Alba “Cellero”; toes elles desarrollaes nel C.P.Xovellanos al que damos les gracies, n’especial al so director Mario Fueyo, poles facilidaes y les semeyes.

Otra miente tán tamién nesta entrada les semeyes del conciertu “Pop piquiñín” que tuvo llugar nun Teatru Xovellanos que cásique quedó completu coles más de 700 persones qu’acudieron a sentir los cantares n’asturianu de Petit Pop. Munchísimes gracies al grupu y collaboradores d’esti conciertu, a Araz Net por editar un discu tan prestosu, a Javi Lueje poles semeyes y el videu que verá la lluz en pocu tiempu,  y a la Fundación Municipal de Cultura del Ayuntamientu de Xixón y la Caxa Rural pol so sofitu pa toes estes actividaes.

“Los amorinos de Bastián y Bastiana” de Nun Tris

Vienres 20 d’avientu Colexu Públicu Xovellanos
Hora: 18.00

Entrada gratuita
Una ópera de W.A. Mozart, pa públicu infantil-familiar

Bastian_Bastiana

La historia d’esta obra que Mozart compunxo de neñu,  tien llugar nuna villa rural. La pastorina Bastiana tien miéu perder l’amor de Bastián. Visita a un bruxu, Colás, una especie de guirriu, pa intentar volver a namoralu. Colás camienta que nun ye que Bastián dexara d’amala, sinón que sucumbiera a los encantos d’una dama que vive en palaciu (que ye la que-y da trabayu a Bastián na ciudá, aparte d’otros agasayos). Aconseya Colás a Bastiana que faga como qu’ ama a otru. Bastián a la vuelta tien miéu que Bastiana nun lu quiera, y tamién visita a Colás, que-y asegura l’amor de Bastiana con un ritual máxicu. Cuando ve que Bastiana tien un comportamientu un tantu desapegáu, Bastián amenaza con suicidase, pero Bastiana nun lu dexa. A la fin, los amantes abrácense y remata la ópera con un curtiu y prestosu tríu final.

Nesta orixinal propuesta pártese d’elementos tradicionales, que van evolucionar a paisaxes urbanos asitiando l’aición na Asturies del S XIX.

Reciella entama nel mes d’avientu en Xixón “Escenines” un ciclu d’actividaes n’asturianu pa neños

Una ópera, un conciertu de música pop y dos cuntacuentacuentos conformen la ufierta que los dos próximos fines de selmana va tener llugar en Xixón.

ImprimirL’asociación “Reciella (families pol asturianu)”, entama nel mes d’avientu una serie d’actividaes n’asturianu que dos fines de selmana van averar a los neños y neñes de Xixón actividaes de distintos tipos, que tomen distintes “escenes” nes que se combina música, teatru, cuentacuentos… y coles que van poder esfrutar d’actividaes, les más d’elles de baldre, que van tener llugar nel Salón d’Actos del Colexu públicu Xovellanos y nel Teatru Xovellanos.

El ciclu foi presentáu por Reciella col nome de Escenines pa la Reciella y nel mesmu representaráse la ópera infantil Los amorinos de Bastián y Bastiana de Nun Tris teatru’l vienres 20 d’avientu nel Colexu Públicu Xovellanos a les 18.00 de la tarde con entrada gratuita. Al otru día, el sábadu 21, la Compañía d’Olga Cuervu va representar tamién a les 18.00 hores nel mesmu llugar, De Rosines, una obra na que los cantares y la música tienen un papel principal.

La siguiente fin de selmana va ser Carlos Alba quien va averar al traviés de títeres y siempres usando l’asturianu, la mitoloxía asturiana a lo más pequeño, col so espectáculu Mitoloxíes que se  va facer el vienres 27 a les 18.00 tamién nel Colexu Públicu Xovellanos.

A lo último, el ciclu cierra’l sábadu 28 cola presentación del discu Pop Piquiñín, un discu del grupu Petit Pop, íntegramente cantáu en llingua asturiana. Nel conciertu, que se va celebrar nel Teatru Xovellanos, va haber actuaciones d’invitaos y collaboradores del grupu. Esta ye la única actividá que nun  va ser gratuita, con una entrada de 3 euros pa neños y 6 p’adultos.

Escenines pa la Reciella

Esti mes d’avientu tamos encantaos de presentar el programa d’actividaes que col sofitu del Ayuntamientu de Xixón y la collaboración del Colexu Xovellanos y la Caxa Rural; va poder cuntar cola presencia de dalgunes de les nuestres compañíes de teatru profesional más prestoses pa los neños y neñes y la presentación del discu n’asturianu Pop Piquiñín.

PROGRAMA MES D’AVIENTU:

COLEXU XOVELLANOS. Entrada de baldre
Vienres 20 – “Los amorinos de Bastián y Bastiana” (18.00 hores) con Nun Tris Teatro
Sábadu 21 – “De Rosines” (18.00 hores) con Compañía Olga Cuervo
Vienres 27 – “Mitoloxíes” (18.00) con Carlos Alba Cellero Acostubaxo Teatru

TEATRU XOVELLANOS. Entrada Infantil 3€/Adultu 6€
Sábadu 28 – “Pop Piquiñín” (18.00 hores) con Petit Pop

Equí ta’l cartelu. ¡Nun vos lo perder!

Imprimir

Galería de semeyes del taller: “Afuracando calabaces”

Próxima actividá: Afuracando calabaces

Semeya del taller del añu pasáu

Semeya del taller del añu pasáu

El próximu sábadu 26 d’ochobre vamos repetir el taller “Afuracando calabaces”, na que los neños y neñes van iguar unes calaveres pa dir preparando la Nueche d’Ánimes (el Samain, o Halloween) como se fai n’Asturies dende hai sieglos. Y amás va haber dalguna sospresa de munchu mieu.
L’actividá va facese nel Colexu Xovellanos de Xixón dende les 11.30 de la mañana y ye abierta, polo que pueden asistir families que nun seyan socies. Ye una actividá gratuita pero has acordate de venir cola calabaza o calabazón.
Si tienes interés en venir has contactar con nós.