L’Asturianu y la Educación Infantil

campaña_matriculaciónEsta selmana púnxose en marcha la campaña de la Conseyería d’Educación del Principáu d’Asturies empobinada a la matriculación del alumnáu na asignatura de Llingua Asturiana, qu’abrió’l pasáu 10 de xunu y durará hasta’l próximu 21 del mesmu mes. Como podéis ver nesti enllace  la campaña va empobinada a Educación Primaria, Educación Secundaria y Bachilleratu; etapes educatives nes que los centros tán obligaos a ufiertar l’asignatura. Nel Segundu Ciclu de la etapa d’Educación Infantil (3-6 años) los centros educativos nun tán obligaos llegalmente a ufiertar l’asignatura. Por embargu sí puen facelo, de fechu calcúlase qu’hai unos sesenta centros n’Asturies onde l’alumnáu d’Educación Infantil sí ta recibiendo clases de Llingua Asturiana. Si esti ye’l casu del centru nel que ta matriculáu’l to fíu o fía animámoste a que los matricules en Llingua Asturiana; sinón lo más probable ye que la dirección del to centru nun tenga conocimientu d’esta posibilidá, polo que recomendámoste que sigas los siguientes pasos: 1. Comprueba si na fueya de matrícula de les asignatures optatives (Llingua Asturiana y Relixón Católica), que tien d’apurrise a les families nestos díes, apaez un apartáu nel que se pueda marcar la “x” pal alumnáu d’Educación Infantil. 2. Si nun apaez la “x” coméntalo cola dirección del centru, treslladando la esperiencia d’estos sesenta centros. 3. Si’l centru presenta rocees a esta cuestión, apurrímoste una fueya modelu pa que metas pel rexistru del to centru, encamentándolos a qu’adapten los impresos d’inscripción y matriculación a esta circunstancia. Impresu Otros datos que pueden interesate seríen: – El docente qu’impartiría l’asignatura nel centru sería la mesma persona encargada de facelo na Educación Primaria, que polo xeneral va tar pendiente de l’axudicación de personal interín del mes de setiembre. – La Conseyería d’Educación tien espublizao unos materiales específicos pa la enseñanza del Asturianu na Educación Infantil. Si tienes cualesquier problema, dulda y suxerencia nun duldes en ponete en contactu con nós: info@reciella.com

Advertisements