Día de la Reciella 2015

Un añu más (¡y yá van tres ediciones!) tamos encantaos de presentar el cartelu del nuestru Día de la Reciella, que va tener llugar nel Muséu del Pueblu d’Asturies el próximu domingu 4 d’ochobre.

Como tolos años l’oxetu d’esta xornada ye poder pasar un día completu en familia nun espaciu y nun contestu nel que la música, los talleres, les actividaes ¡y hasta la comida! seya n’asturianu.

Nos próximos díes daremos a conocer el programa d’actividaes.

Cartelu del Día de la Reciella 2015

Cartelu del Día de la Reciella 2015

Prematrícula La Escolina 2015/2016

La Escolina ye una iniciativa d’aprendizaxe del asturianu entamada pola asociación de families pol asturianu Reciella.

Una hora a la selmana pela tarde, al traviés del xuegu y l’aprendizaxe manipulativu y por descubrimientu; los neños y les neñes practiquen o acceden a la llingua asturiana nun entornu de socialización con reciella de la so edá acompañaos por profesoráu especializao y en grupinos pequeños.

Sitios:

Xixón, Uviéu y Candás*

Edaes:

Grupu 1’5 y 2 años

Grupu 3 y 4 años

Grupu 5 y 6 años

Grupu 7 a 9 años

Horariu: L’horariu final y el día de la selmana de caún de los grupos alcordaráse coles families.

Preciu: 20 euros al mes.

Si tas interesáu/ada en que los tos fíos o fíes vengan a La Escolina mándanos un corréu a info@reciella.com o un mensaxe priváu al Facebook indicando fecha de nacimientu, conceyu y preferencia o restricciones de día y horariu.

*Si hai neños y neñes bastantes hai posibilidá de facer grupos n’otros conceyos

Descarga’l CARTELU equí: Prematrícula_Escolina

Nota prensa: Festival Escenines

Un añu más l’asociación Reciella: Families pol asturianu pon en marcha’l festival d’artes escéniques “Escenines pa la Reciella”; una muestra de dalgunos de los espectáculos infantiles más interesantes que se tán faciendo nesti momentu n’Asturies.

El festival, que va tener llugar a lo llargo de les primeres vacaciones escolares, ta compuestu por cuatro espectáculos de diferente calter: dos cuentacuentos, un teatru de solombres acompañáu de música y una obra de teatru en forma monólogu.

Dende l’asociación sorrayen la importancia de que los neños asturfalantes, asina como los que tienen interés y curiosidá por aprender l’idioma, tengan la oportunidá d’asistir a actividaes qu’utilicen la llingua asturiana con normalidá fuera del ámbitu escolar. Al tiempu manifiesten la importancia de que’l rexistru llingüísticu de les compañíes seya correctu, pa que’l modelu de referencia se presente de manera natural y seria.

Toles representaciones van tener llugar nel Salón d’actos del C.P. Jovellanos de Xixón (Cai La Merced) a les 19.00 hores. Amás de la escuela, Reciella cuenta cola collaboración económica del Ayuntamientu de Xixón y la Caja Rural pa realizar el ciclu.

Taller: Facemos un grupu de Rock

Esti sábadu tenemos l’actividá “Facemos un grupu de rock” y vien con sospresa, porque van tar con nós Mar y Lara de Petit Pop enseñándonos los instrumentos que faen falta pa facer un grupu. Amás vamos tocar y cantar con elles el so tema “Patu Pachu”, asina qu’has dir deprendiendo tolos animalinos que salen nel cantar. Vamos facelo a les 11.30 nel Conseyu de Mocedá de Xixón y recordámosvos que les families que nun seyan socies de Reciella tienen d’acutar sitiu previamente (nel nuesu email o nesta páxina pues mandanos un mensaxe priváu). L’actividá ye pa neños y neñes de 0 a 6 años.