¿Por qué queremos llevar a los nuestros fíos y fíes a una escuela infantil n’asturianu?

Postura de l’asociación “Reciella: families pol asturianu” a propósitu de la propuesta de poner en marcha una escuela infantil (de 0 a 3 años) en Xixón na que l’asturianu seya la llingua vehicular.

ANTECEDENTES

La nuestra asociación forma parte, dende hai un par d’años, del Conseyu Asesor de la Llingua Asturiana del conceyu de Xixón; del que tamién formen parte partíos políticos con representación municipal, sindicatos y otres asociaciones ciudadanes.

Nesi contestu valoramos el borrador del nuevu Plan de Normalización Llingüística del conceyu, proponiendo incluir nel mesmu lo que yá ye una demanda clásica de la nuestra asociación: que se tenga en cuenta a los falantes patrimoniales d’asturianu más pequeños nes escueles infantiles públiques de titularidá municipal.

Finalmente’l borrador, aprobáu nel día d’ayeri (23 de febreru de 2016) recueye esta demanda nos siguientes términos:

  • Estudiar la creación d’ un programa pilotu del asturianu como llingua vehicular nun centru de 0-3.

¿POR QUÉ?

La respuesta ye evidente: porque los nuestros fíos y fíes tienen l’asturianu como llingua materna y lo meyor pal so desarrollu intelectual y emocional ye qu’haya una continuidá ente l’idioma de casa y el de la escuela. Esto, que ye cenciello d’esplicar, pue desarrollase más con delles esplicaciones qu’aclaren conceptos y eviten confusiones.

La educación, na llingua de casa

Tolos estudios que se tienen fecho sobre l’adaptación al contestu educativu de les neñes y los neños señalen que l’aprovechamientu ye muncho meyor cuando se fai nel mesmu idioma que sienten en casa. N’otres palabres, cuando se fai na llingua preferente, la que sienten con más frecuencia dende que nacen. La última n’unise a esta reflexón y esta demanda foi la mesma UNESCO, qu’aprovechó’l Día Internacional de la Llingua Materna (pasáu 21 de febreru) pa recordar que pa una educación de calidá la llingua de casa tien de tar presente na mesma.

Postura inclusiva, non esclusiva

La nuestra asociación naz cola voluntá de mantener vivu esti patrimoniu inmaterial de tola ciudadanía asturiana que ye l’asturianu, y facelo como lo ficieron con nós les nuestres families y como ye más eficaz esta conservación, pente medies de la tresmisión a les xeneraciones más nueves.

Somos perfectamente conscientes de qu’esta tresmisión va producise nun mundu cambiante y plural, y queremos que los nuestros fíos y fíes seyan partícipes d’esta pluralidá, valorando la riqueza llingüística mundial, empezando pola otra llingua del contestu, el castellanu, y siguiendo por otres llingües mayoritaries como l’inglés, el francés, etc. Esto ye: queremos construir a partir del asturianu, pero nun dexar de construir y ufiertar un contestu plurillingüe que-yos abra la puerta a esta sociedá global. Si na escuela hai más idiomes amás del asturianu tanto meyor. Cuantos más, meyor.

Aprovechamientu de recursos

Tamién somos conscientes de que les escueles infantiles tán faltes de recursos, entamando poles propies profesionales que nelles trabayen y que davezu demanden una implicación mayor per parte de l’alministración. Polo tanto entendemos que l’estudiu tien de valorar la formación de les persones que yá trabayen nestes escueles, pues tamos seguros que bien d’elles tán yá perfectamente capacitaes pa ufiertar un contestu billingüe, ensin qu’en nengún casu suponga una mayor carga de trabayu pa estes persones.

Voluntariedá pa families

Queremos sorrayar que se trataría d’un proyectu pilotu nel que participaríen aquelles families qu’asina lo solicitaren, y que se llevaría alantre de mano nuna sola escuela, polo que nun supondría obligación nenguna pa les families que nun tuvieren d’alcuerdu cola propuesta.

Sicasí hai que tener en cuenta que les families de Reciella que viven en Xixón yá representaríen neños y neñes suficientes como pa llenar un grupu escolar completu. Esto ye, nosotros mesmos podemos cubrir la nuestra propuesta de programa pilotu.

Más nada. Agradecer a toles persones con sensibilidá hacia esta demanda social, entamando pol propiu Conseyu Asesor y siguiendo pola comunidá educativa del conceyu en xunto.

12741903_974890665936062_4835487655749172989_n

Advertisements

Escenines 2015: Programa completu

Ta p’acabar el primer trimestre del cursu  y con esti motivu, y coincidiendo coles vacaciones escolares, l’asociación “Reciella: families pol asturianu” vuelve a entamar una nueva edición del Festival Escenines pa la Reciella.

Coincidiendo con esta tercera edición el programa d’actividaes ye especialmente ambiciosu, y formen parte d’él dende la música hasta los monólogos o los espectáculos de teatru.

Toles representaciones, un total de cuatro, van tener llugar nel Salón d’Actos del Colexu Xovellanos de Xixón, y la entrada ye gratuita.

Domingpresentación_bestiariuu 27 d’avientu, 12.00 hores: Conciertu Presentación de “Bestiariu”

El festival inagúrase cola presentación del discu coeditáu por Reciella “Bestiariu”, nel que conocíos músicos asturianos como Dixebra, Pauline en la Playa o David Varela componen ya interpreten cantares dedicaos a diferentes animales asturianos.

 

 

Miércoles 30 d’avientu, 19.00 hores: Teatru “Grana de cardamomu”

grana_cardamonu

Momentu de la representación | Semeya El Callejón del gato”

La conocida y premiada compañía asturiana “El callejón del gato” estre
na nel nuestru festival la obra “Grana de cardamomu”. Una obra que fala del viaxe fantásticu que fai una neña a la busca de la grana d’una enigmática planta. Guapísima escenografía y acompañamientu musical pa esta obra que tien percorrío, na so versión en castellanu, diferentes teatros españoles.

arriba_periscopiu

Momentu de la obra | Semeya d’Higiénico papel

Sábadu 2 de xineru, 12.00 hores: Teatru “Arriba’l periscopiu”

La compañía Higiénico Papel cuéntanos esta historia inspirada na esploración de los fondos marinos y les primeres persones que s’atrevieron a ponese nos mandos de les máquines que se somorguien nes fríes agües pa descubrir los sos secretos.

 

 

 

Llunes 4 de xineru, 19.00 hores: Monólogu “Xuan soldáu”

Xuan_soldáu

Momentu del monólogu | Semeya de Carlos Alba

Carlos Alba “Cellero” ye l’encargáu de poner enriba les tables la historia de Xuan soldáu y les sos aventures: la de cuando se topó con un Magu que-y concedió un deséu, cuando fue quien a vencer al mieu y a una Bisarma o Pantasma, cuando se fizo ricu y tuvo que lluchar contra´l Diañu Cabra Mayor.

 

 

 

 

 

 

 

Programa: Día de la Reciella 2015

PROGRAMA DÍA DE LA RECIELLA 2015

Domingu 4 d’ochobre de 2015 – Muséu del Pueblu d’Asturies (Xixón)

11.00. Taller de xuegos tradicionales asturianos
Entama Asociación Cultural Esbilla
12.00. Conciertu del Dúu Mestura 
13.00. Taller gastronómicu “Descubriendo los nuestros quesos” con Lluis Nel Estrada (“40 Primaveres”) y la colaboración de La Gijonesa.
14.00 Posa y xinta
16.00 Gynkana infantil: “Lletres nel Muséu”
17.00 Taller “Xugando cola música”
Entama Escuela de Música Tradicional La Quintana.
18.00 Conciertu músicos La Quintana
19.00 Danza Prima y Pieslle

Amás: Pintacares (12.00 y 17.00 hores), rifa de productos infantiles n’asturianu (18.30), tiendes del aire con llibros de lliteratura infantil y xuvenil, espaciu pa les asociaciones y los servicios de normalización llingüística, TV n’asturianu con “Presta Asgaya”, comida y bébora, y la esposición “Agora Quini, agora“.

*La entrada ye llibre y toles actividaes y talleres son gratuites sacante’l pintacares (1 €)
Los menores tienen de tar acompañaos por una persona adulta en tou momentu.
El taller gastronómicu precisa d’inscripción previa na tienda del aire de Reciella.

Día de la Reciella 2015

Un añu más (¡y yá van tres ediciones!) tamos encantaos de presentar el cartelu del nuestru Día de la Reciella, que va tener llugar nel Muséu del Pueblu d’Asturies el próximu domingu 4 d’ochobre.

Como tolos años l’oxetu d’esta xornada ye poder pasar un día completu en familia nun espaciu y nun contestu nel que la música, los talleres, les actividaes ¡y hasta la comida! seya n’asturianu.

Nos próximos díes daremos a conocer el programa d’actividaes.

Cartelu del Día de la Reciella 2015

Cartelu del Día de la Reciella 2015

Prematrícula La Escolina 2015/2016

La Escolina ye una iniciativa d’aprendizaxe del asturianu entamada pola asociación de families pol asturianu Reciella.

Una hora a la selmana pela tarde, al traviés del xuegu y l’aprendizaxe manipulativu y por descubrimientu; los neños y les neñes practiquen o acceden a la llingua asturiana nun entornu de socialización con reciella de la so edá acompañaos por profesoráu especializao y en grupinos pequeños.

Sitios:

Xixón, Uviéu y Candás*

Edaes:

Grupu 1’5 y 2 años

Grupu 3 y 4 años

Grupu 5 y 6 años

Grupu 7 a 9 años

Horariu: L’horariu final y el día de la selmana de caún de los grupos alcordaráse coles families.

Preciu: 20 euros al mes.

Si tas interesáu/ada en que los tos fíos o fíes vengan a La Escolina mándanos un corréu a info@reciella.com o un mensaxe priváu al Facebook indicando fecha de nacimientu, conceyu y preferencia o restricciones de día y horariu.

*Si hai neños y neñes bastantes hai posibilidá de facer grupos n’otros conceyos

Descarga’l CARTELU equí: Prematrícula_Escolina

Nota prensa: Menudu Traxín

El xueves 2 “Menudu Traxín”, averará’l baille y el traxe tradicional asturianu a lo más pequeño de la casa

L’actividá, entamada por Vezos Astures y Reciella,  ye gratuita y va facese nel patiu del Colexu Xovellanos de Xixón

Cartelu_MenuduTraxín“MENUDU TRAXÍN, día del traxe y el baille tradicional pa neños y neñes” ye una iniciativa con vocación de continuidá añal entamada por Vezos Astures y Reciella p’averar el traxe y el baille tradicional a lo más pequeño de la casa.

La so primer edición va celebrase esti xueves 2 d’abril nel patiu del Colexu Xovellanos de Xixón (entrada pela cai Begoña) dende les 10.30 hasta les 14.00 hores. Toles neñes y neños – y les sos families- tán convidaos a venir; col traxe o ensin él, sepan o nun sepan baillar y falen o nun falen asturianu.

Va haber talleres, xuegos, y actividaes pa deprender a baillar y pa conocer el traxe del país, too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes.

Tolos neños y neñes tienen que dir acompañaes d’una persona adulta. La entrada ye llibre y toles actividaes son gratuites y cuenten cola collaboración del Colexu Públicu Xovellanos y la Oficina de Normalización Llingüística de Xixón.

PROGRAMA

10.30 h. ENTAMU: xuegos tradicionales, photocall, talleres de colorear

12.00 h. TALLER DE BAILLE: Páxara Pinta, Capuchinos, Cachetíus y Danza del Pumba.

13.00 h. PASACAIS

Nota prensa: Festival Escenines

Un añu más l’asociación Reciella: Families pol asturianu pon en marcha’l festival d’artes escéniques “Escenines pa la Reciella”; una muestra de dalgunos de los espectáculos infantiles más interesantes que se tán faciendo nesti momentu n’Asturies.

El festival, que va tener llugar a lo llargo de les primeres vacaciones escolares, ta compuestu por cuatro espectáculos de diferente calter: dos cuentacuentos, un teatru de solombres acompañáu de música y una obra de teatru en forma monólogu.

Dende l’asociación sorrayen la importancia de que los neños asturfalantes, asina como los que tienen interés y curiosidá por aprender l’idioma, tengan la oportunidá d’asistir a actividaes qu’utilicen la llingua asturiana con normalidá fuera del ámbitu escolar. Al tiempu manifiesten la importancia de que’l rexistru llingüísticu de les compañíes seya correctu, pa que’l modelu de referencia se presente de manera natural y seria.

Toles representaciones van tener llugar nel Salón d’actos del C.P. Jovellanos de Xixón (Cai La Merced) a les 19.00 hores. Amás de la escuela, Reciella cuenta cola collaboración económica del Ayuntamientu de Xixón y la Caja Rural pa realizar el ciclu.