L’ASOCIACIÓN “RECIELLA. FAMILIES POL ASTURIANU” VE INACEPTABLE QUE VUELVAN A VULNERASE LOS DERECHOS DEL ALUMNÁU D’EDUCACIÓN INFANTIL
L’asociación demanda que se cumpla d’una vez el mandáu de la Llei d’Usu, aprobada nel añu 1998, cola incorporación del asturianu nel currículu de la etapa d’Educación Infantil
Después de les declaraciones de la conseyera d’Educación, doña Lydia Espina, nes qu’aseguraba que l’asturianu va quedar otra vuelta fuera del currículu d’Educación Infantil; dende Reciella queremos espresar el nuestru profundu maltar por esta decisión, puntualizando delles cuestiones:
1. La Llei d’usu, aprobada nel añu 1998, conseña de manera clara que l’asturianu ha tar presente en toles etapes educatives. Polo tanto ye una illegalidá, con toles lletres, que la Conseyería d’Educación lleve ensin aplicar esti mandáu casi trenta años. D’alcuerdu cola llei tol alumnáu d’Educación Infantil tien derechu a recibir enseñances de Llingua Asturiana si esi ye’l so deséu, tanto nel so primer ciclu (0-3 años) como nel segundu (3-6), que depende directamente de la Conseyería d’Educación.
2. Como bien sabemos la etapa d’Educación Infantil ye’l momentu nel que se produz l’alquisición del llinguaxe per parte de los neños y neñes, polo que son unos años especialmente importantes y sensibles pa la introducción d’estos na enseñanza reglada. Y lo son nun doble nivel: pa aquelles families que partiendo del castellanu aspiren al plurillingüismu (castellanu, inglés, asturianu) pa los sos fíos y fíes. Pero tamién pa los rapacinos y rapacines (¡que n’Asturies siguen esistiendo!) que son falantes d’asturianu y a los que’l sistema obliga a recibir toles sos hores llectives nun idioma diferente del suyu, cuestión que ta sobradamente denunciada como improcedente por organismos internacionales como la UNESCO.
3. Paeznos ridículo que se fale d’esperiencies “esperimentales” col asturianu na Educación Infantil, cuando sabemos que ta perfectamente implantáu en más de cuarenta centros asturianos dende qu’entamó la enseñanza de l’asignatura de Llingua Asturiana nos años ochenta.
Denunciamos asina mesmo qu’esto sea posible gracies al esfuerzu personal de los docentes y equipos directivos d’estos centros, asina como les demandes de les families; yá que la Conseyería namás permite que s’imparta esta asignatura cuando hai funcionarios de carrera nel centru que puedan facese cargu o bien cuando hai “horariu sobrante” del profesoráu interín axudicáu. Dicho d’otra manera: la Conseyería d’Educación fai la “vista gorda” cuando nun-y cuesta perres.
Por tolo espuesto dende Reciella, como families con alumnáu escolarizáu nel sistema educativu asturianu, desiximos que la Conseyería d’Educación aproveche’l cambiu llexislativu y l’adaptación de los currículos por acabar d’una vez por toes cola illegalidá que lleva “alcagüetando” toos estos años. Que regule los conteníos a impartir na etapa, que dote del profesoráu que faiga falta y que d’una vez tenga en cuenta los derechos de los neños y neñes asturfalantes, víctimes silencioses de la dexación de funciones de l’Alministración.