Comunicáu de prensa: asturianu nel currículu d’Educación Infantil

L’ASOCIACIÓN “RECIELLA. FAMILIES POL ASTURIANU” VE INACEPTABLE QUE VUELVAN A VULNERASE LOS DERECHOS DEL ALUMNÁU D’EDUCACIÓN INFANTIL

L’asociación demanda que se cumpla d’una vez el mandáu de la Llei d’Usu, aprobada nel añu 1998, cola incorporación del asturianu nel currículu de la etapa d’Educación Infantil

Después de les declaraciones de la conseyera d’Educación, doña Lydia Espina, nes qu’aseguraba que l’asturianu va quedar otra vuelta fuera del currículu d’Educación Infantil; dende Reciella queremos espresar el nuestru profundu maltar por esta decisión, puntualizando delles cuestiones:

1. La Llei d’usu, aprobada nel añu 1998, conseña de manera clara que l’asturianu  ha tar presente en toles etapes educatives. Polo tanto ye una illegalidá, con toles lletres, que la Conseyería d’Educación lleve ensin aplicar esti mandáu casi trenta años. D’alcuerdu cola llei tol alumnáu d’Educación Infantil tien derechu a recibir enseñances de Llingua Asturiana si esi ye’l so deséu, tanto nel so primer ciclu (0-3 años) como nel segundu (3-6), que depende directamente de la Conseyería d’Educación.

2. Como bien sabemos la etapa d’Educación Infantil ye’l momentu nel que se produz l’alquisición del llinguaxe per parte de los neños y neñes, polo que son unos años especialmente importantes y sensibles pa la introducción d’estos na enseñanza reglada. Y lo son nun doble nivel: pa aquelles families que partiendo del castellanu aspiren al plurillingüismu (castellanu, inglés, asturianu) pa los sos fíos y fíes. Pero tamién pa los rapacinos y rapacines (¡que n’Asturies siguen esistiendo!) que son falantes d’asturianu y a los que’l sistema obliga a recibir toles sos hores llectives nun idioma diferente del suyu, cuestión que ta sobradamente denunciada como improcedente por organismos internacionales como la UNESCO.

3. Paeznos ridículo que se fale d’esperiencies “esperimentales” col asturianu na Educación Infantil, cuando sabemos que ta perfectamente implantáu en más de cuarenta centros asturianos dende qu’entamó la enseñanza de l’asignatura de Llingua Asturiana nos años ochenta.

Denunciamos asina mesmo qu’esto sea posible gracies al esfuerzu personal de los docentes y equipos directivos d’estos centros, asina como les demandes de les families; yá que la Conseyería namás permite que s’imparta esta asignatura cuando hai funcionarios de carrera nel centru que puedan facese cargu o bien cuando hai “horariu sobrante” del profesoráu interín axudicáu. Dicho d’otra manera: la Conseyería d’Educación fai la “vista gorda” cuando nun-y cuesta perres.

Por tolo espuesto dende Reciella, como families con alumnáu escolarizáu nel sistema educativu asturianu, desiximos que la Conseyería d’Educación aproveche’l cambiu llexislativu y l’adaptación de los currículos por acabar d’una vez por toes cola illegalidá que lleva “alcagüetando” toos estos años. Que regule los conteníos a impartir na etapa, que dote del profesoráu que faiga falta y que d’una vez tenga en cuenta los derechos de los neños y neñes asturfalantes, víctimes silencioses de la dexación de funciones de l’Alministración.

FESTIVAL ESCENINES 2021

D’alcuerdu coles medíes sanitaries puestes en marcha pola Fundación Municipal de Cultura del Ayuntamientu de Xixón, ye necesario rexistrase p’asistir a les representaciones programaes dientro del Festival Escenines.

• Rexístrate a la representación o representaciones a les que quieras asistir.
• Fai falta rexistrar a toles persones qu’asistan (adultes o menores) per separtao.
• Vas recibir un corréu de confirmación de que’l rexistru tuvo llugar correctamente.
• A la entrada del espectáculu comprobaremos que’l to nome ta na llista de control.

Asina mesmo recordamos que ye obligada la asistencia con mázcaru y encamentamos tamién l’usu d’esta midida de prevención pa los menores de 6 años.

¡Gracies por collaborar!

PICA NA IMAXEN P’ACCEDER AL FORMULARIU DEL ESPECTÁCULU QUE TE PRESTE

El viaxe d’Irina ENTRAES ESCOSAES

El monstruu revoltixu ENTRAES ESCOSAES

Nina cocinamieos ENTRAES ESCOSAES

Sumámonos a la iniciativa “Asturies Cultura en Rede”

Reciella families pol asturianu apúntase a la ufierta cultural que propón la iniciativa “Asturies cultura en rede” empobinada pola Conseyería de Cultura, Política Llingüística y Turismu.

Esta Conseyería pon en marcha, en collaboración colos conceyos asturianos, “Asturies, Cultura en Rede”, un proyectu pal espardimientu de les artes escéniques, la música, la lliteratura, les artes plástiques, el cine, el patrimoniu y la cultura tradicional nel Principáu. Coles mires de dar mayor visibilidá a les y los creadores d’Asturies, dinamizar la cultura y vertebrar el territoriu, programa circuitos culturales temáticos, nos que se prioriza la participación de pequeños y medianos conceyos, y que permiten la programación de distintos espectáculos teatrales y musicales, esposiciones y eventos lliterarios y de música tradicional presentaos por estremaes compañíes, grupos y artistes asturianos.

 Teatru, danza, maxa, teatru d’oxetos y títeres… Les compañíes d’artes escéniques profesionales afincaes n’Asturies ufierten n’espacios escénicos convencionales y non convencionales espectáculos calidables que destaquen pola so creatividá, inxeniu y compromisu, al igual que les bandes musicales y solistes profesionales del Principáu, con una amplia variedá d’estilos que van dende la música de cámara, barroca y clásica hasta’l folk, pop y la música electrónica.

 Los alcuentros lliterarios, clubes de llectura, talleres creativos, conferencies, charles y coloquios o presentaciones de llibros que promueve “Asturies, Cultura en Rede” son fundamentales pa la promoción de la lliteratura y la llectura ente la ciudadanía a lo llargo de tola xeografía asturiana, na que tamién se pue esfrutar d’una variada programación cinematográfica. Ficción, documental, comedia, drama, animación, cine comprometíu y educativu integren esta estaya dedicada al Séptimu Arte, qu’inclúi dende dalgunos de los meyores títulos del cine contemporaneu a grandes clásicos de la cinematografía, y qu’otorga relevancia especial a los trabayos fechos por cineastes del Principáu.

 La divulgación de la historia, el patrimoniu, la cultura popular y la tradición asturiana tamién tán presentes n’“Asturies, Cultura en Rede”, a lo que se van sumar relevantes proyectos espositivos d’artes plástiques y visuales d’artistes del Principáu, que van ser espuestos nos conceyos asturianos a lo llargo de 2021. 

 La ufierta cultural pa tol territoriu asturianu puede consultase na web www.asturiesculturaenrede.es.

Escenes infantiles pa rematar l’añu

Un añu más, y yá van cinco, l’asociación “Reciella: families pol asturianu” organiza’l so festival Escenines, teatru n’asturianu pa neños y neñes.

El Festival, qu’entamara celebrándose nel salón d’actos del colexu públicu Xovellanos de Xixón, afita la so sede nel Antiguu Institutu Xovellanos, onde yá tuvieron llugar l’añu pasáu delles actividaes.

L’entamu va ponelu’l miércoles 27 l’actor Carlos Alba, “Cellero”, qu’acompañáu pol so fíu Martín Peña Alba pondrá sobre les tables del salón d’actos del Antiguu Institutu una versión revisada de los cuentos de tradición oral.

Un día depués, el xueves 28, la compañía Kamante Teatro representará “¿De qué color ye’l sol?”, una obra encamentada pa neños pequeños a partir de 3 añinos.

El mesmu marxen d’edá va ser el recomendáu pal tercer de los espectáculos, robláu pola compañía El Callejón del gato, y que ta basáu nel álbum de lliteratura infantil y xuvenil “La neña de les trences al revés”, llevando’l mesmu nome.

Estos tres espectáculos van tener el Centru de Cultura Antiguu Institutu como espaciu de celebración. Toos ellos asina mesmo a les 19.00 hores.

Otra miente, y como ramu a festival, Escenines treslládase’l sábadu 30 a les 12.00hores al colexu Xovellanos pa la presentación del discu Bestiariu, un discu qu’una vuelta más atropa a dalgunes de les bandes asturianes más reconocíes, cantando pa neños y n’asturianu.

Dende la organización recuerden que toles actividaes son de baldre, polo que recomienden llegar con tiempu bastante pues van trancase les puertes al completar l’aforu.

Apúntate na II Entaína

Esti domingu 1 d’ochobre vamos a echa-y otra vuelta una carrera al tiempu y ganar una nueva xeneración pal asturianu, pasando’l testigu na II Entaína.

El percorríu ye bien cenciellu, pa que pueda con él tola familia, y va tener llugar nel Muséu del Pueblu d’Asturies, dientro de les actividaes entamaes pal V Día de la Reciella.

Entainái a apuntavos nel nuestru formulariu:

Reciella entrega los sos reconocimientos “Escuela afayadiza”

Reciella entrega los sos reconocimientos “Escuela afayadiza”

L’sociación quier premiar cola so insignia a les escueles con un altu númberu de matriculación na asignatura d’Asturianu

Coincidiendo col final del cursu l’asociación Reciella Families pol Asturianu presenta les sos insignies “Escuela Afayadiza”, unes pegadielles que les escueles d’Educación Primaria van tener oportunidá de poner na entrada los centros, renovándoles cursu tres cursu.

Los reconocimientos, qu’esti añu “namás van poder ponese en marcha nel conceyu de Xixón, onde cuntamos colos datos de matriculación na asignatura de Llingua Asturiana”, van ser de tres tipos: “Reconocimientu d’oru”, pa la escuela del conceyu con un mayor porcentaxe de matriculación; “Reconocimientu de plata”, pa les que tienen una matrícula igual o superior al 75%; y “Mención especial”, en reconocimientu a dalguna escuela que por dellos factores trescendentes, tenga de ser destacada nel cursu.

Dende l’asociación treslladen que “nesti momentu, que tanto se valoren los sellos de calidá, entendemos qu’hai un númberu importante de families como nosotros pa les que l’apueste decidíu de la escuela pol plurillingüismu ye importante a la hora de matricular a los rapacinos”. Por esa razón “paeznos importante visibilizar el compromisu de la comunidá educativa d’estes escueles, pues nun se nos escapa que, anque la voluntariedá depende de la decisión de les families, los claustros, equipos directivos y el bon llabor docente tienen muncho que dicir na visibilización de l’asignatura”.

C.P. Santa Olaya, primer escuela con “Reconocimientu d’oru”

Nesta ocasión el reconocimientu d’oru va dir pal colexu públicu Santa Olaya, asitiáu nel barriu d’El Natahoyo. Trátase d’una escuela con un porcentaxe de matrícula que ta a piques de llegar al 100%, concretamente del 93%, lo que l’asitia arriba del podium.

Tocante a los reconocimientos de plata, van dir pal C.P. Honesto Batalón, C.P. Montiana, C.P. Antonio Machado y C.P. Xove; toos ellos con una matriculación superior al 75% d’alcuerdu colos datos facilitaos pola Conseyería d’Educación.

Pa cabu la “Mención Especial” ye pal centru concertáu Patronato San José, qu’anguaño cuenta con un 75% de matrícula. “Pese a que por porcentaxe correspondería-y el Reconocimientu de plata, paeznos que ye trescendente qu’un centru concertáu tenga una matrícula tan alta, yá que los más de centros d’esti tipu algamen unos datos mui probes”, asina “animamos al restu de centros concertaos a que sigan l’exemplu del Patronato y caminen hacia un modelu trillingüe”.

Cursos siguientes

Dende l’asociación esperen que seya posible acceder a los datos del restu los conceyos, lo que diba permitir escender los reconocimientos. Asina mesmo van valorar ellaborar insignies asemeyaes con otres etapes educatives: Educación Infantil, Secundaria y Bachilleratu, onde la implantación de l’asignatura ye, entá más ruina.

Programa: Escenines Iviernu 2016 – 2017

Préstanos muncho presentavos el programa del nuestru Festival de Teatru y Artes Escéniques pa neños y neñes y n’asturianu.

Decidíi les actividaes que más vos presten y apuntáiles na axenda, ¡pasamos llista!

Conciertu-presentación Bestiariu 2

Llunes 26 d’avientu de 2016

Salón d’actos del C.P. Jovellanos

12.00 h.

Entrada llibre hasta completar aforu

Bestiariu 2 ye un CD pa tola familia qu’incluye temes de 12 bandes asturianes que canten n’asturianu. Na presentación, cola presencia de los grupos, fadráse un recorríu per tol discu, que tien a los animales como filu conductor.

Conciertu-presentación Pulgarina (versión n’asturianu)

Xueves 29 d’avientu de 2016

Salón d’actos del Centru de Cultura Antiguu Institutu

19.00 h.

Entrada llibre hasta completar aforu

Presentación, con un recorríu peles páxines y la música del llibru-discu d’Alicia Álvarez ilustráu por Alicia Varela, na qu’acompañaremos a ‘Pulgarina’,  una neña apesadumbrada pol so tamañu qu’entama un viaxe de descubrimientu personal onde nada ye lo que paez sinón sólo una cuestión de perspectiva.

Retalinos

Llunes 2 de xineru de 2017

Salón d’actos del Centru de Cultura Antiguu Institutu

12.00 h.

Entrada llibre hasta completar aforu

Una representación a cargu d’Olga Cuervo y David Varela na que los protagonistes son una muñeca de trapu y un güelín que vive con ella, y onde que la música y les canciones tienen especial importancia.

Una casa

Martes 3 de xineru de 2017

Salón d’actos del C.P. Jovellanos

19.00 h.

Entrada llibre hasta completar aforu

La compañía Higiénico Papel Teatro trainos esta obra que narra les aventures d’Andrés y la so familia qu’acaben de movese a una casa nueva. Los espectadores, neños y mayores vivirán l’aventura de recorrer de nueche la casa buscando al güelu.

Runa

Miércoles 4 de xineru de 2017

Salón d’actos del C.P. Jovellanos

19.00 h.

Entrada llibre hasta completar aforu

– Nesta obra de la compañía Nun Tris, una actriz presenta cuentos y narraciones de los cinco continentes nun viaxe alredor del mundiu, falando de les sos costumes y tradiciones y acompañada d’un narrador-músicu, qu’interpreta fragmentos de música de cada llugar.

Formulariu d’inscripción I Entaína

Día de la Reciella 2016

Tamos encantaos de presentar el cartel de la que ye la cuarta edición del nuestru Día de la Reciella.

Y como queremos seguir medrando esti añu cuntamos con más actividaes, más collaboradores y una novedá especialmente prestosa: la primer edición de la carrera de families pol asturianu Entaína.

Esta carrera ye precisamente la que garra más protagonismu nel cartel, simbolizando’l testigu’l propiu idioma y la tresmisión de xeneración en xeneración, aspectu nel que tamos especialmente enfotaos y enfotaes dende los entamos de l’asociación. Pa tresmitir esa idea cuntamos esti añu col diseñador Marco Recuero, col que ye un placer collaborar.

Mañana mesmo tará disponible na nuestra web el formulariu d’inscripción, y a lo llargo d’estos díes diremos dando más información, tanto de la carrera como del restu d’actividaes que van desarrollase esi día.

Asina que yá sabéis, el domingu 2 d’ochobre tenéis una cita a la que nun podéis faltar, ¡pasái’l testigu!

 

Escenines 2015: Programa completu

Ta p’acabar el primer trimestre del cursu  y con esti motivu, y coincidiendo coles vacaciones escolares, l’asociación “Reciella: families pol asturianu” vuelve a entamar una nueva edición del Festival Escenines pa la Reciella.

Coincidiendo con esta tercera edición el programa d’actividaes ye especialmente ambiciosu, y formen parte d’él dende la música hasta los monólogos o los espectáculos de teatru.

Toles representaciones, un total de cuatro, van tener llugar nel Salón d’Actos del Colexu Xovellanos de Xixón, y la entrada ye gratuita.

Domingu 27 d’avientu, 12.00 hores: Conciertu Presentación de “Bestiariu”

El festival inagúrase cola presentación del discu coeditáu por Reciella “Bestiariu”, nel que conocíos músicos asturianos como Dixebra, Pauline en la Playa o David Varela componen ya interpreten cantares dedicaos a diferentes animales asturianos.

 

 

Miércoles 30 d’avientu, 19.00 hores: Teatru “Grana de cardamomu”

Momentu de la representación | Semeya El Callejón del gato”

La conocida y premiada compañía asturiana “El callejón del gato” estre
na nel nuestru festival la obra “Grana de cardamomu”. Una obra que fala del viaxe fantásticu que fai una neña a la busca de la grana d’una enigmática planta. Guapísima escenografía y acompañamientu musical pa esta obra que tien percorrío, na so versión en castellanu, diferentes teatros españoles.

Momentu de la obra | Semeya d’Higiénico papel

Sábadu 2 de xineru, 12.00 hores: Teatru “Arriba’l periscopiu”

La compañía Higiénico Papel cuéntanos esta historia inspirada na esploración de los fondos marinos y les primeres persones que s’atrevieron a ponese nos mandos de les máquines que se somorguien nes fríes agües pa descubrir los sos secretos.

 

 

 

Llunes 4 de xineru, 19.00 hores: Monólogu “Xuan soldáu”

Momentu del monólogu | Semeya de Carlos Alba

Carlos Alba “Cellero” ye l’encargáu de poner enriba les tables la historia de Xuan soldáu y les sos aventures: la de cuando se topó con un Magu que-y concedió un deséu, cuando fue quien a vencer al mieu y a una Bisarma o Pantasma, cuando se fizo ricu y tuvo que lluchar contra´l Diañu Cabra Mayor.